Þar kom að því!
"Loksins" gætu margir eflaust hugsað!
 Loksins kemur pistill um eitthvað annað en stjórnmál og hátekjuskatt!
Það er ekkert grín að búa með þessum manni, það get ég sagt ykkur!
Alla daga talar hann um ójöfnuð og algebru, það hefur einnig komið fyrir að ég vakni upp um miðja nótt við það að hann tautar eitthvað upp úr svefni um vísitölugengi og kostnaðaráætlun framfærslufjár.
Það tók mig 8 ár að sannfæra hann um að ég hefði engan áhuga á fótbolta! Þegar það loksins tókst þá tekur þetta við?!? Á ég að trúa því að næstu 8 ár lífs míns fari í að hlusta á það hvað það yrði agalegt ef markaðsverð á trúboðum félli gífurlega og marktækt með tilliti til gengisverðs á erlendri grundu? (Já ég veit! Þetta  hljómar í meira lagi undarlega...a.m.k. hljómar þetta svona í mínum eyrum og einstaka sinnum kemur lítið ískur inn á milli sem ég hef enga skýringu á)

En eins og tekið var fram í upphafi á þessi pistill ekki að snúast um stjórnmál né annað álíka áhugavert!
Þessi pistill á nefnilega eingöngu að fjalla um málfræði!
"Jibbí" kunna nú margir að hrópa upp yfir sig og hristast um í stólnum af einskærri gleði, gegnumsýrðir af taumlausum tryllingi!
Ég er auðvitað að grínast, hér verður ekkert fjallað um málfræði. Ef ég væri ekki að grínast þá myndi ég segja "skammastu þín" við ábyrgðarmann Jólasveinadisksins sem kom út í fyrra! Anna Magný var svo lukkuleg að fá þennan annars ágæta disk að gjöf frá ömmu Möggu núna fyrir jólin. Nema hvað! Hurðaskellir hefur þarna tekið sér bessaleyfi og breytt gömlum og grónum texta sem áður hljóðaði svo: "hæ hæ ég hlakka til, hann að fá og gjafirnar..." í: "Hæ hæ mig hlakkar til, hann að fá og gjafirnar..."
!!!
Mér er nákvæmlega sama hvort fólk segi: Mér hlakkar, mig hlakkar eða gamla góða ég hlakka...en þetta finnst mér of langt gengið!
Hvað um það, fólk hefur reynt að uppörva mig eftir þetta áfall með orðum eins og: "lífið heldur áfram, þú munt bráðum sjá ljósið á ný"... og ég held að ég sé á réttri leið loksins með það. Það versta er yfirstaðið.

Að öðru...
Hér í Lögten gengur lífið bara sinn vanagang. Við höfum það fínt í rigningunni og rokinu en myndum alveg vilja fá smá snjó til að geta farið á snjóþotu. Ef ég væri aftur á móti heima núna þá myndi ég reita hár mitt og biðja veðurguðina um hlýrra veður og jafnvel örlitla vætu og rok! Svona getur mannskepnan verið undarlegt fyrirbæri.

Ég er að gera góða hluti í starfi mínu hér í Vosnæsparken firs! Nú er til dæmis háannatímabil hjá mér og reyndar öðrum í svipuðum bransa...er ekki til dæmis uppgjör í flestum fyrirtækjum? Jú. En ég hef tekið að mér að horfa algjörlega ótilneydd á fimmtu seríu af Fóstbræðrum og hef ég haft hina mestu skemmtun af. Það sem maður leggur ekki á sig í þágu starfsframans...

Jæja...
best að fara að skúra!

ps. EF ENGINN KOMMENTAR ÞÁ... legg ég upp laupana! Ég skil ekki hvernig Elli nennir að skrifa þetta allt út í loftið og enginn virðist lesa!

Túrílú!